ஒரு காவலனின் கதை - மினி லயன் காமிக்ஸ்

இக்கதைக்கு போகும் முன் கடந்த சார்லியின் பதிவுகளை படிக்காதவர்கள் கீழே உள்ள லிங்குகளை கிளிக் செய்து படித்து விடுங்கள்.

1.  சிறை மீட்டிய சித்திரக்கதை 
2.  குரங்கு தேடிய கொள்ளையர் புதையல்
3.  ஒரு கள்ளப்பருந்தின் கதை 

 ஒரு காவலனின் கதையின் கதாநாயகனும் சார்லியின் நண்பர் ஸ்வீனியே. நகைச்சுவையாக ஆரம்பிக்கும் கதை பின் சென்டிமெண்டாக சென்று எதிர்பாராத திருப்பத்துடன் முடியும். கதை சார்லி தென் அமெரிக்காவில் இருப்பதால் ஸ்வீனியை ஒரு முரட்டு பெண்மணிக்குபாதுகாவலனாக இருக்க அனுப்புவதாக நமது மினிலயனில் கதை ஆரம்பிக்கும். ஆனால் சார்லி உண்மையில் தென்அமெரிக்காவில் தான் இருந்தாரா என்பதை கீழே ஆரம்பபக்கத்தில் காணலாம்.

சார்லி கதைகள் தினசரி கதைகளாக வெளிவந்தவை என்பதால் கதைகள் முந்தைய கதையில் இருந்தே ஆரம்பிக்கும். இதனால் தேவையில்லாதவைகளை நமது ஆசிரியர் நீக்கியிருப்பார். நமது மினி லயனில் மேலே படத்தில் உள்ள முதல் இரு கட்டங்கள் இருக்காது. கதையில் வரும் பெண்மணியால் ஸ்வீனி படும் அவஸ்தைகள் மிகவும் ரசிக்க வைக்கும். பாதுகாவலனாக வரும் ஸ்வீனி வேலைக்காரனாக படாதபாடு படுவார்.

அந்த பெண்மணியை சமாளித்து வந்த வேலையை எப்படி ஸ்வீனி முடிக்கிறார் என்பதே கதை. கதையில் இடையே நம்மை நெகிழவைக்கும்இடங்களும் உண்டு. இக்கதையை ஆங்கிலத்தில் படிக்க விரும்புவர்கள் இந்த லிங்கை கிளிக் செய்து டவுன்லோட் செய்து படித்து கொள்க. அட்டை பட ஸ்கேன் தந்து உதவிய விஸ்வாவிற்கு நன்றி.

- லக்கி லிமட்

ஒரு கள்ளப்பருந்தின் கதை! - மினி லயன் காமிக்ஸ்

முத்து காமிக்ஸில் வெளியான சார்லி (எ) பஸ் சாயரின் சிறை மீட்டிய சித்திரக்கதை மற்றும் குரங்கு தேடிய கொள்ளையர் புதையல் பற்றி கடந்த பதிவுகளில் பார்த்தோம். கடந்த பதிவுகளை படிக்காதவர்கள் கீழே உள்ள லிங்குகளை கிளிக் செய்து படித்து விடுங்கள்.

1.  சிறை மீட்டிய சித்திரக்கதை 
2.  குரங்கு தேடிய கொள்ளையர் புதையல்

 
இம்முறை நமது மினி லயனில் வெளியான சார்லியின் ஒரு கள்ளப்பருந்தின் கதை பற்றி பார்ப்போம். இதன் அட்டைபடத்தை மேலே காணலாம். அட்டைபடத்துக்கும் கதைக்கும் துளியும் சம்பந்தமில்லை. இந்த கதையோடு பிற சில கதைகளும் இந்த இதழில் வெளியாகின. இந்த இதழை பற்றி நமது எடிட்டர் விஜயனின் பதிவு - நினைவோ ஒரு பறவை !. இக்கதையின் கதாநாயகன் சார்லியின் நண்பர் ஸ்வீனியே. கதையின் ஆரம்ப பக்கம் கீழே

புதியதாக வீடு ஒன்றை கட்டி குடியேறும் ஸ்வீனி , அங்கே அவருக்கும் பக்கத்தில் குடியிருக்கும் அம்மையாருக்கும்  வரும் பிரச்சனைகளே கதை. ஆரம்பத்திலிருந்து முடிவு வரை காமெடியாக செல்கிறது கதை.

இக்கதையை ஆங்கிலத்தில் படிக்க இந்த லிங்கை கிளிக் செய்து டவுன்லோட் செய்து கொள்ளவும்.

- லக்கி லிமட்

குரங்கு தேடிய கொள்ளையர் புதையல் - முத்து காமிக்ஸ்

சார்லி (எ) பஸ் சாயரின் கிளாசிக் கதையான சிறை மீட்டிய சித்திரக்கதை பற்றி போன பதிவில் பார்த்தோம். போன பதிவை படிக்காதவர்கள் இந்த லிங்க்கை கிளிக் செய்து படித்து விடுங்கள். இந்த பதிவில் முத்து காமிக்ஸில் சார்லி நமக்கு அறிமுகமான கதையான குரங்கு தேடிய கொள்ளையர் புதையல் கதையை பற்றி பார்க்க போகிறோம். இந்த குரங்கு தேடிய கதையின் முடிவிலிருந்தே  சிறை மீட்டிய சித்திரக்கதை ஆரம்பித்திருக்கும். அட்டை மற்றும் உள் தலைப்பு படங்கள் கீழே

முதலில் இக்கதைக்கு போகும் முன் சார்லியை பற்றி சில தகவல்களை பார்த்து விடுவோம். சார்லி (எ) பஸ் சாயர் என்ற கதாபாத்திரத்தை உருவாக்கியவர் Roy Crane என்ற கார்ட்டூன் சித்திரங்கள் வரைபவர். சார்லி கதைகளில் பெரும்பாலான கதைகள் அனைத்தும் தினசரி செய்திதாள்களில் வந்தவையே. சார்லி கதாபாத்திரம் இரண்டாம் உலகப்போரில் கடற்படை போர் விமானியாக அறிமுகபடுத்தப்பட்டு, போர் முடிவுக்கு பின் ஒரு எண்ணெய் கம்பெனியில் பழுதுபார்ப்பவராக இருந்து, பின் மீண்டும் கடற்படையில் ஜெட் விமானியாக பணியாற்றிவிட்டு, கடைசியாக தனியார் துப்பறிவாளராக மாறினார். நமது முத்து காமிக்ஸில் வந்த கதைகள் சார்லி துப்பறிவாளராக இருப்பதாக வந்த கதைகளே. கதையின் முதல் பக்கம் கீழே

இக்கதையில் சார்லியின் பழைய போர்க்கால நண்பரான ராஸ்கோ சுவீனி அறிமுகமாகிறார். நமது முத்து காமிக்ஸில் இவர் அறிமுகமாவதிலிருந்து கதை ஆரம்பிக்கும். ஏன் சுவீனி திடீரென சார்லியிடம் வந்து இணைந்ததற்கான காரணம் இருக்காது. நமது எடிட்டர் இதற்கு முந்தைய நான்கு பக்கங்களை தவிர்த்து விட்டு சுவீனி அறிமுகமாவதிலிருந்து ஆரம்பித்திருப்பார். இது கதைக்கு தேவையில்லை என்பதால் வெட்டி விட்டார் போலும். அதற்கான காரணத்தையும் பதிவின் முடிவில் உள்ள லிங்க் மூலம் கதையை டவுன்லோட் செய்து படித்து கொள்க. கீழே கதை ஆங்கிலத்தில் ஆரம்பமாகும் பக்கத்தை காணலாம்.

இனி கதைக்கு போவோம். ஒரு வயதான மூதாட்டியின் வீட்டில் அடிக்கடி குரங்கு ஒன்று கத்தும் சத்தமும் , விசிலடிக்கும் சத்தமும் கேட்கிறது. இதனால் பயந்து போன மூதாட்டி போலீசை அழைத்து குரங்கை பிடிக்க கூறுகிறார். ஆனால் அங்கே பலமுறை வரும் போலீசார் தேடிப்பார்த்து விட்டு குரங்கு ஏதுமில்லை என கூறிவிட்டு சென்று விடுகின்றனர். ஆனால் அதன் பின்னரும் மூதாட்டிக்கு குரங்கு போடும் சத்தம் தொடர்ந்து கேட்கிறது. இதனால் சார்லியின் துப்பறியும் நிறுவனத்தின்  உதவியை நாடுகிறார் மூதாட்டி.

 சார்லியும்,சுவினியும் குரங்கை பற்றி துப்பறிய மூதாட்டியின் வீட்டுக்கு செல்கின்றனர். தினமும் கத்திய குரங்கு எப்படி மாயமாய் மறைகிறது? குரங்கை சார்லி மற்றும் சுவீனி குழு கண்டுபிடித்ததா? என்பதை மீதிக்கதையை இந்த லிங்க்கை கிளிக் செய்து டவுன்லோட் செய்து தெரிந்து கொள்க. முத்து காமிக்ஸின் ஸ்கேன்களை தந்து உதவிய விஸ்வாவிற்கு நன்றி.

- லக்கி லிமட்

நான்(சிறை) மீட்டிய சித்திரக்கதை - முத்து காமிக்ஸ்

வெகுநாளாக நான் படிக்க வேண்டும் என்று ஆவல் கொண்டிருந்த கதை நமது முத்து காமிக்ஸில் வெளிவந்த சிறை மீட்டிய சித்திரக்கதை. எனக்கு இந்த கதையின் தீரா ஆவல் வர காரணம் இலுமினாட்டி எழுதிய இக்கதை பற்றிய இந்த பதிவு. மேலும் முத்து ஃபேன் அவர்கள் எழுதிய இந்த பதிவு. அடுத்த முக்கிய காரணம், இக்கதை நமது எடிட்டர் விஜயன் அவர்களின் விருப்பமான டாப் 10 கதைகளில் ஒன்று. இக்கதையை பற்றி விஜயன் அவர்கள் தனது டாப் 10 பட்டியலில் கூறியதை கீழே காணலாம்.

இக்கதை நமது முத்துவில் 1975 ஆம் வருடம் முதலில் வெளிவந்தது. அதன் பின் மீண்டும் மறுபதிப்பும் செய்யப்பட்டுள்ளது.  இந்த இரண்டு பதிப்புகளின் அட்டை படங்களை கீழே காணலாம். (தகவல் மற்றும் அட்டை படங்கள் முத்து ஃபேன் வலைப்பூவிலிருந்து)


இக்கதையின் கதாநாயகன் தமிழில் சார்லி. ஆனால் ஆங்கில மூலத்தின் ஒரிஜினல் பெயர் பஸ் சாயர்(Buz Sawyer). பஸ் சாயரின் கதைகள் இந்திரஜால் காமிக்ஸ் , மேகலா காமிக்ஸில் கூட வெளிவந்துள்ளது. இக்கதையை படிக்க பல பேரிடம் கேட்டும் கிடைக்கவில்லை. சரி ஸ்கேன் பண்ணியாவது தாங்கப்பா என கேட்டும் கிடைக்கவில்லை. கடைசியாக இக்கதையை பற்றி வெளிநாடு செல்வோர் கவனத்திற்கு! என தலைப்பிட்டு பதிவிட்ட நம்ம ஜானியிடம் கேட்டும் கிடைக்கவில்லை. காமிக்ஸ் கிளாசிக்ஸில் வெளியிடுவார் என நினைத்திருந்தால் நமது எடிட்டரும் பஸ் சாயரின் மற்றொரு கதையான குரங்கு தேடிய கொள்ளையர் கதையை தான் வெளியிட போவதாக கூறி விட்டார்.

சரி இணையத்தில் ஆங்கில மூலத்தை தேடி படிக்கலாம் என்றால் இக்கதை வெளியான வருடம் மற்றும் எதில் வெளியானது  என்பது பற்றி சிறு தகவல் கூட கிடைக்கவில்லை. தமிழ் காமிக்ஸ் ரசிக பிதாக்கள் பலரிடம் கேட்டும் யாருக்கும் தெரியவில்லை. இருந்தும் தேடினேன் தேடினேன் நான்கு வருடங்களாக தேடினேன் கிடைக்கவில்லை. ஏன் சிறு தகவல் கூட கிடைக்கவில்லை. கதையின் ஆங்கில பெயரும் தெரியாததால் எப்படி கூகுளில் தேடுவது என தெரியவில்லை. buz sawyer என தேடினால் பழைய கதைகள் அல்லது ஏற்கனவே தெரிந்த கதைகளே கிடைத்தன.

எதிர்பார்த்தது எதிர்பாராமல் கிடைக்கும் என்பதை போல இரண்டு வாரங்களுக்கு முன் முத்து ஃபேன் வலைப்பூவை மேய்ந்து கொண்டிருந்த போது மீண்டும் அவர் பதிவிட்ட இக்கதை பற்றிய பதிவை படித்தேன். அதில் இக்கதையில் முக்கியமாக பங்கேற்கும் சித்திரக்கதை வெளியிடும் Bangkok Post என்ற பத்திரிக்கை பற்றியும் கூறியிருந்தார். இந்த Bangkok Post  என்ற வார்த்தையை வைத்து தேடியதில் இந்த கதையை பற்றிய விபரம் கிடைத்தே விட்டது. அப்போது நான் அடைந்த சந்தோசத்தை சொல்லி மாளாது. அதை நம்மை போன்ற காமிக்ஸ் ரசிகர்களே உணர முடியும்.

ஓகே விஷயத்திற்கு போவோம். எனக்கு கிடைத்த தகவல்படி இக்கதை வெளியான வருடம் 1974. Muscatine Journal என்ற தினசரி ஆங்கில பத்திரிக்கையில் செப்டம்பர் 3 ஆம் தேதியிலிருந்து நவம்பர் 16 ஆம் தேதி வரை தினந்தோறும் மூன்று படங்களாக தொடராக வெளிவந்திருக்கிறது. இந்த பத்திரிக்கை ஞாயிறு வெளிவராது. இது வெளிவந்த பக்கத்தின் பெயர் Comics & Features. இதில் Buz Sawyer கதைகளோடு பிற காமிக்ஸ் தொடர்களும் வெளிவந்தது. இக்கதைக்கு இதில் பெயர் இல்லை.

அப்பாடா கதை கிடைத்து விட்டது. இனி முழுவதாக படித்து விடலாம் என மகிழ்ந்து கொண்டிருக்கையில் மற்றொரு இடி விழுந்தது. கதை தினசரி பத்திரிகையில் வெளிவந்ததால் எந்த பக்கத்திலும் வெளிவந்திருக்கலாம். ஆகவே அந்த பத்திரிகையில் முதலில் எந்த பக்கத்தில் வந்துள்ளது என கண்டுபிடிக்க வேண்டும். இது கூட அவ்வளவு கஷ்டமில்லை. அந்த தளத்தில் இலவசமாக ஒரு நாளைக்கு இரண்டு செய்திதாள்கள் தான் படிக்க முடியும். மேலும் பக்கத்தை டவுன்லோட் செய்ய முடியாது. இந்த கதையை மட்டும் வெட்டி தான் எடுக்க வேண்டும் இல்லாவிடில் 19டாலர் பணம் கட்ட வேண்டும்.

என்னடா இது கைக்கு கிடைத்தது வாய்க்கு கிடைக்காது போலவே என நொந்த போது நமது பிளாக்கில் ஓட்டெடுப்பு நடத்தும் போது கள்ள ஓட்டு போடுவோமே அந்த யுக்தி நியாபகம் வந்தது. அதை பயன்படுத்தி இரண்டு நாட்கள் ஒரே மூச்சாக பக்கங்களை வெட்டி எடுத்து விட்டேன். என்னுடைய இந்த வீரபிரதாபங்களை எல்லாம் ஏன் சொல்கிறேன் என்றால் ஒரு பழைய காமிக்ஸ் கதை பல நாட்களாக தேடி கையில் கிடைக்கும் போது எனக்கு கிடைக்கும் சந்தோசம் அளவில்லாதது. இன்றைய பரபர இயந்திர உலகிலிருந்து காலஇயந்திரம் மூலம் சிறுவயதிற்கே மீண்டும் சென்று விட்ட உணர்வை ஏற்படுத்துகிறது. கதையின் முதல் பக்கம் கீழே

கதையில் நமது இந்தியா முக்கிய பங்கு வகிக்கிறது. காஸ்மீர்,கல்கத்தா மற்றும் எவரெஸ்ட் போன்றவை வருகின்றன. கதையை ஏற்கனவே இலுமினாட்டி அலசி, ஆராய்ந்து, சிலாகித்து விட்டதால் இதோ கதை சுருக்கம். உலகை சுற்றும் சித்திரக்கதை வரைவதில் ஆர்வம் கொண்ட கெல்லி , காஸ்மீரில் ஃபூவி என்ற பெண்ணை சந்தித்து காதல் கொள்கிறான். இவர்கள் இந்தியாவிற்கு பக்கத்தில் உள்ள ஒரு நாட்டிற்க்கு செல்லும் போது ஃபூவி அங்கே இருக்கும் ஒரு குதிரைவீரன் சிலையில் ஏறி போட்டோ எடுத்ததற்காக அவமதிப்பு செய்ததாக குற்றம் சாட்டப்பட்டு சிறையில் அடைக்கப்படுகிறாள். கதையின் கடைசி பக்கம் கீழே

சிறையில் அடைக்கப்பட்ட  ஃபூவியை நமது கதாநாயகர் சார்லி எப்படி காப்பாற்றுகிறார் என்பதே கதை. ஃபூவியை காப்பாற்றுவதில் ஒரு சித்திரக்கதை எப்படி முக்கிய பங்கு வகிக்கிறது என்பதை கதையை படிக்காதவர்கள் படித்து தெரிந்து கொள்ளுங்கள். இந்த லிங்க்கை கிளிக் செய்து ஆங்கில கதையை டவுன்லோட் செய்து கொள்ளலாம்.

- லக்கி லிமட்

Fringe [2008-2013]

பல நாள் Draftல் அரைகுறையாக தூங்கி கொண்டிருந்த இந்த பதிவுக்கு போன வாரம் முடிந்த இந்த சீரீஸின் முடிவால் விடிவு வந்திருக்கிறது. Time Travel கதையை கொண்ட படம் என்றால் அது எப்படிப்பட்ட பிளாப் ஆன படமானாலும் தேடி பிடித்து பார்க்கிற ஆள் நான். இதற்கு காரணம் Back To The Future படம். பிளஸ்2 படிக்கும் போது எப்படிடா இப்படி எல்லாம் யோசிச்சு படம் எடுக்குறாங்கனு நினைக்க வச்ச படம். படத்தை பார்த்து விட்டு படத்தை பார்க்காதவர்களிடம் கதையை சொல்லுவதிலேயே ஒரு ஆனந்தம்,கெத்து இருந்தது அப்போது.இதற்கு பிறகு பல Time Travel படங்கள் பார்த்திருந்தாலும் இதனை போல் என்னை எதுவும் கவரவில்லை.

வேற எந்த Time Travel படமும் இனிமேல் இது போல் பிடிக்காது என நினைத்திருக்கும் போது நம்ம பாலா அறிமுகபடுத்திய ஆங்கில சீரீஸ் Lost  எனது வாயை பிளக்க வைத்தது. ஒவ்வொரு episode முடியும் போதும் அடுத்த எபிசோடை பார்த்தே தீர வேண்டும் என்ற வெறியை உண்டாக்கியது. Time travel மட்டுமில்லாமல் அதனை ஒட்டிய பல Sci-Fi சமாச்சாரங்களை வைத்து அதகளம் பண்ணியிருப்பார்கள்.இதை பற்றி பாலா எழுதிய பதிவை இங்கே காணலாம்.Sci-Fi ரசிகர்கள் தவற விட கூடாத நாடகம் இது. அடுத்து என்ன வரும்னு பொறுமை இல்லாமல் அவசர கதியில் பார்த்ததால் பல விஷயங்கள் புரியவில்லை .மீண்டும் முதலில் இருந்து பார்க்க எண்ணியுள்ளேன்.

சரி...Fringe சீரீஸ்க்கு வருவோம். Time travel சம்பந்தப்பட்ட அனைத்து Sci-Fi விஷயங்களை கொண்ட இன்னொரு நாடகம். Time Travel , Parallel Universe , Time Line,Time leak என சொல்லிக்கொண்டே போகலாம். Time இதில் முக்கியமானதாக இருந்தாலும் அது போக பல Sci-Fi விஷயங்களையும்,Scienceக்கு அப்பாற்பட்ட விஷயங்களையும்(அதாவது Fringe Science என இதில் சொல்வார்கள்)  கலந்தடிப்பார்கள்.  உதாரணமாக Shape Shifting,Mutation,Pattern இப்படி என்னென்னமோ சொல்வார்கள்.  அதற்காக ராவாக போகும் என நினைக்க வேண்டாம். விறுவிறுப்புக்கும்,திரிலிங்க்கும் பஞ்சமிருக்காது.

இந்த சீரீசை உருவாக்கியவர் Lost சீரீஸ் உருவாக்கியவர்களில் ஒருவரான , மேலும் MI-3 , Star Trek , Super 8 போன்ற படங்களின் டைரக்டர் J.J Abrams. Lost சீரீஸ் ஒன்றே போதும் இவரது திறமைக்கு. மேலும் வரப்போகும் Star Trek இரண்டாம் பாகம் மற்றும் Star Warsஇன் அடுத்த பாக டைரக்டரும் இவரே.

Walter ஒரு அறிவியல் ஆய்வாளர் விஞ்ஞானி. அவரின் ஏழு வயது மகன் Peter ஒரு அரிய நோயால் பாதிக்கபடுகிறான். பல வருடங்களுக்கு முன்னர் இருந்த இந்த நோயை அப்போது குணப்படுத்திய டாக்டர் 1936ல் இறந்து விடுகிறார். இதனால் டைம் டிராவல் செய்து 1936 க்கு முன்னர் சென்று அந்த டாக்டரை நிகழ்காலத்திற்கு அழைத்து வந்து தன் மகன் Peterஐ காப்பாற்ற நினைக்கிறார் Walter. ஆனால் அதற்காக கண்டுபிடிக்கும் கருவி அவர் நினைத்ததை போல் செயல்படாமல் வேறுவிதமாக செயல்படுகிறது. இதனால் தன் மகன் Peterஐ காப்பாற்றமுடியாமல் போகவே Peter இறந்துவிடுகிறான். இதனால் மிகவும் நொந்து போன Walter அடுத்து செய்யும் ஒரு காரியம் இரு உலகங்களை புரட்டி போட போகிறது என தெரியாமல் செய்து விடுகிறார். .இந்த நிகழ்வுகள் நடப்பது 1980களின் மத்தியில்.

பல வருடங்களுக்கு பின் தற்போதைய காலத்தில் 2008ல் ,  Scienceக்கும் அப்பாற்பட்ட அல்லது தற்போதைய Scienceஆல் விளக்கம் அளிக்க முடியாத பல விஷயங்களையும், நிகழ்வுகளையும் (இதனை Fringe Science என்கின்றனர்) கண்டறிய, ஆராய FBI ஆல் Fringe Division என்னும் பிரிவு உருவாக்கபடுகிறது. இதில் பணியாற்றுபவள் கதாநாயகி Olivia. தானாக Auto Pilot மூலமாக பாஸ்டன் நகரில் தரை இறங்குகிறது ஒரு விமானம். உள்ளே இருந்த 147 பயணிகள் அனைவரும் அடையாளம் தெரியாத அளவிற்கு சிதைந்து  எலும்புகள் மட்டும் எஞ்சிய நிலையில் இறந்திருக்கிறார்கள். இதை போல் பல விளக்கமுடியாத  நிகழ்வுகள் நடக்க ஆரம்பிக்கின்றன. இதனை ஆராய ஆரம்பிக்கிறாள் Olivia.

இதற்கு உதவ மற்றும் ஆராய விஞ்ஞானி Walter ஐ அணுகுகிறாள். ஆனால் Walter இருப்பதோ மனநல மருத்துவமனையில், மேலும் பழைய நினைவுகள் பலவற்றை மறந்த நிலையிலும்,  நிலையான மனநிலை இல்லாதவராக இருக்கிறார். எனவே அவரை கட்டுக்குள் வைக்கவும், செயல் பட வைக்கவும் அவரது மகன் Peter ஐயும் உடன் சேர்த்து கொள்கிறாள். இந்த மூவர் குழு Fringe நிகழ்வுகளை ஆராய ஆரம்பிக்கிறது. Peter தான் சிறுவயதிலேயே இறந்து விட்டானே எப்படி வந்தான் என கேட்பவர்களுக்கு விடை , இரண்டாவது சீசனில் .

இப்படி Fringe நிகழ்வுகளை ஆராய்ந்து , நடக்க போகும் விபரீதங்களை தடுத்து கேஸை முடிப்பதாக The X Files சீரீஸ் போலவே செல்லும் முதல் சீசன் ஏழு ,எட்டு  எபிசொடுகளுக்கு பிறகு புது தடத்தில் பயணிக்க ஆரம்பிக்கிறது. மதில்களை வழியே  ஊடுருவி சென்று பல பேங்க் safe deposit boxகளை கொள்ளையடிக்கிறது ஒரு கும்பல். அந்த safe deposit boxகளிருந்து எடுக்கப்பட்ட பாகங்களை இணைத்து உருவாக்கப்படும் teleportation device மூலமாக யாரும் தப்பவே முடியாத ஜெர்மன் சிறையில் இருந்து teleportation மூலமாக தப்புகிறான் Jones என்பவன்.

இதிலிருந்து விறுவிறுவென சூடு பிடித்து ஓடும இந்த சீரீஸ் முதல் சீசன் முடிவிலிருந்து ஜெட் வேகத்தில் பயணிக்கிறது. காரில் சென்று கொண்டிருக்கும் Olivia திடீரென காணாமல் போக... Peter 1978-1985 என பொறிக்க பட்டிருக்கும் தன் மகன் Peter கல்லறைக்கு Walter சென்று அஞ்சலி செலுத்த... காணாமல் போன Olivia 9/11/2001 இல் தீவிரவாதிகளால் இடிக்கப்பட்ட World Trade Center இல் இருக்க...ஆனால் வருடம் 2008 ... என பல திருப்பங்களோடு முடியும் முதல் சீசன் இரண்டாவது சீசனை உடனே பார்க்க வைத்து விடும். முதல் சீசனின் ட்ரைலர் கீழே


முதல் சீசனின் முடிவு தான் இப்படி என்றால் இரண்டாவது சீசனின் ஆரம்பம்  அடுத்து வரும் 20 வினாடிகள் டைட்டிலை கூட பார்க்க பொறுக்காமல் ஓட்ட வைத்தது. திடீரென காரிலிருந்து காணாமல் போன Oliviaவை தேடி Walter மற்றும் Peter கார் இருக்கும் இடத்திருக்கு வர, Walter காரின் உள்ளே சென்று ஆராய அடுத்து நடப்பதை கீழே பாருங்கள்...


 முதல் சீசன் முடிவு போலவே இரண்டாவது மற்றும் மூன்றாவது சீசன் முடிவுகளும் உங்களை அடுத்த சீசனுக்காக காத்திருக்க முடியாமல் இருக்க வைக்கும். அதிலும் மூன்றாவது சீசனின் முடிவு இந்த சீரீஸின் பெஸ்ட் Finale. நாலாவது சீசன் பாதி வரை நன்றாக செல்லும் சீரீஸ் அதற்கடுத்து எல்லா சீரீஸ் போல கழுதை தேய்ந்து கட்டெறும்பான கதை தான். நாலாவது சீசனோடு முடித்திருக்கலாம். ஐந்தாவதாக 13 எபிசோடு கொண்ட சீசன் என இழுத்து போன வாரம் தான் முடித்திருக்கிறார்கள். என்னை பொறுத்தவரை  Sci-Fi ரசிகர்களுக்கான சரியான தீனி இந்த சீரீஸ் . அனைத்து சீசன்களும் முடிந்து விட்டதால் மொத்தமாக டவுன்லோட் செய்து பார்த்து விடலாம்.

- லக்கி லிமட்

The Expatriate [2012]

The Dark Knight இல் நடித்த Aaron Eckhart நினைவிருக்கிறதா...?. முதலில் Harvey Dent ஆக Batmanனுடன் சேர்ந்து குற்றவாளிகளை பிடிக்கும் நேர்மையான வக்கீலாகவும், பின்னர் ஜோக்கரால் மனம் மாற்றப்பட்டு பாதி வெந்த முகத்துடன் Two Face ஆக பயங்கர வில்லனாக நடித்தவர். இவர் தான் இப்படத்தின் ஹீரோ. இப்படத்தின் கதை ஒன்றும் புதியது இல்லை. ஒரே வரியில் சொல்லி விடலாம். போலீஸ் மற்றும் வில்லன்களால் துரத்தப்படும் ஹீரோ.

ஹீரோ Logan ஒரு Ex-CIA அதிகாரி. தாயை இழந்த தன் மகளுடன் பெல்ஜியமில்  ஒரு Security சாதனங்கள் தயாரிக்கும் கம்பெனியில் என்ஜினியராக வேலை பார்க்கிறான். அவனது வேலை தயாரிக்கப்படும் Security கருவிகளில் உள்ள குறைபாடு மற்றும் அதை எப்படி ஹேக் செய்து தகர்க்கலாம் என்பதை கண்டு பிடிக்கும் வேலை. மேலும் பல படங்களில் பார்த்தது போல் தன் டீன்ஏஜ் மகளுடன் அந்த வயதுக்கே உரித்தான   பிரச்சனைகளோடு , மகளுக்கு தான்  Ex-CIA என்பது தெரியாமல் வாழ்ந்து வருகிறான்.

ஒருநாள் தனக்கு வேலையாக கொடுக்கப்பட்ட Security லாக்கர் இரண்டை எப்படி ஹேக் செய்து திறக்கலாம் என கண்டுபிடித்து தனது மேல்அதிகாரியிடம் கூற , அவர் இன்று இரவுக்குள் ரிப்போர்ட் ரெடி செய்து கொடுத்து விட்டு போக சொல்ல, தனது மகளுக்கு செய்து கொடுத்த வாக்குறுதியை மறந்து விட்டு  ரிப்போர்ட்கொடுத்து விட்டு வெளியேறுகிறான். பின் தன் மகளை ஸ்கூலில் இருந்து அழைத்து கொண்டு  வரும் வழியில் மகளுக்கு உணவு அலர்ஜி ஏற்பட அப்படியே மருத்துவமனைக்கு சென்று அங்கேயே இரவு இருந்து விட்டு காலையில் கிளம்புகிறார்கள்.

போகும் வழியில் ஒரு வெளியாக தன் ஆபிஸ்க்கு வர அங்கே ஒரு குண்டூசி கூட இல்லாத அளவிற்கு துடைத்து எடுக்கப்பட்டு இருக்கிறது. அங்கே ஒரு அலுவலகம் இருந்ததிற்க்கான அறிகுறியே இல்லாத அளவிற்கு இருக்கிறது. தன் சகபணியாளர்களுக்கும், அலுவலக நம்பர்களுக்கும் போன் செய்ய, எல்லாம் செயலிழந்து இருக்கின்றன. உடனே தனது Head  ஆபிஸ்க்கு சென்று விசாரிக்கிறான். அப்படி அலுவலகமே எங்களுக்கு இல்லை  என்கிறார்கள்.

என்னவென்று மெல்ல மெல்ல ஆராய தான் ஏமாற்றப்பட்டு இருப்பதையும்,அவன் பணிபுரிந்த கம்பெனி உருவாக்கப்பட்டதே அந்த Security லாக்கர் திறக்கும் வழியை கண்டுபுடிக்க என்றும், உண்மையில் அந்த லாக்கர்கள் CIAவிற்கு பயன்படும் லாக்கர்கள் என்றும்,  அவனுடன் பணிபுரிந்த அனைவரும் கொல்லப்பட்டதையும் அறிகிறான். அதேவேளையில் அவனையும், மகளையும் கொல்லவும் துரத்த ஆரம்பிக்கிறார்கள். இதோடு CIAவும் இவனை தேட ஆரம்பிக்கிறது. இருவற்க்குமிடையே மாட்டிக்கொண்டு எப்படி தன் மகளையும் காப்பற்றி, தானும் தப்புகிறான் என்பதே படம்.

இதே கதையை கொண்டு பல படங்கள் வந்திருக்கின்றன. இனிமேலும் இதே கதையை ஆக்சன் காட்சிகளையும் , திருப்பங்களையும் மாற்றி இன்னும் எத்தனையோ படங்கள் எடுக்கலாம். ஆனால் இவை இரண்டும் ரசிக்கும் படி இருந்தால் எத்தனை படங்கள் என்றாலும் பார்க்கலாம். துரத்தல் படங்களில் இருக்கும் விறுவிறுப்பு இப்படத்திலும் கடைசிவரை இருப்பதால் நம்மால் போரடிக்காமல் ரசிக்க முடியும். மேலும் இறுதியில் வில்லன்களை பெரிதும் ஆர்ப்பாட்டம் இல்லாமல் போட்டு தள்ளும் தந்திரம் அருமை. இந்த CIA ரக ஆக்சன் பட பிரியர்களுக்கு கண்டிப்பாக பிடிக்கும். படத்தின் ப்ளுரே பிரிண்ட் டவுன்லோட் செய்ய கிடைகிறது. ட்ரைலர் மேலே.

- லக்கி லிமட்